Le priorità

L’ano scorso, de sti tempi,
co la Giunta ben schierà,
l’avea in conferensa stampa
annuncià le priorità:
“Sarà l’anno del traforo!,
di filobùs e sicuressa!,
d’Arsenal, Castelsampiero,
funicolare!... che belessa!”.
’Dèsso, proprio de sti giorni
de bilanci e consuntivi,
ai giornài i g’ha ’nunciàdo
tutti i novi preventivi!,
e i ha messo in bela mostra
tutto quelo che i farà,
annunciando in grande pompa
quale i è le priorità:
“Sarà l’anno del traforo!,
di filobùs e sicuressa!,
d’Arsenal, Castelsampiero,
funicolare!... che belessa!”
Nel sentir sti gran proclami,
dopo un anno sempre i stessi,
mai nessun che ghe domanda:
“Ma... ne ciàpelo par fessi?!”
No: i giornài sensa commenti
i trascrive el so discorso,
e i le lassa indisturbati
a contàr quela de l’orso!
Solo el poro cittadino
el se sente buzarà,
tratà come un deficiente,
’bindelàdo e imbidonà...
e, vagando coi pensieri
in serca de consolassion,
el pol ’almanco rifugiarse
in sta sola conclusion:
“Tasi che fòrsi in sto ano
no m’è mìa cressù l’età...
pararìa, da sti discorsi,
che no’l fusse mai passà!”