El genio e la speransa

Non contenti d’aver dato
gran dolori e grande pena
col progetto demensiale
or de cuèrzare l’Arena,
i vol far a la Gran Guardia
una grande esposission
de tuti quanti i disegneti
qua invià par l’occasion:
e tendoni e mudandoni,
grandi ombrèle sul bocàl
balonsìni pronti al volo,
mongolfiere original...
E i ha incaricà de farla
proprio quelo che ogni tanto
de sempiàde allucinanti
se ne inventa, e mena vanto:
una statua gigantesca
impilonà su la collina,
tuto un tetto par Via Nova
su la gente che cammina,
un barcon che stàga a gala
e po’ el salta su la strada,
n’antra Casa tutta falsa
che a Romeo sia intitolàda...
E de quel che le asseconda
el dise tuto imboressà:
“De politica l’è un genio!
N’antro mai no ghe n’è stà!”
Senonché po’ ’l stesso giorno
i giornài come un sol coro
i ne annuncia la notissia
che l’è morto anca ’l traforo!
Dopo anni de proclami,
paginoni in sotto e in su,
de promesse e de gran bale...
dèsso no, no i le fa più!
E el l’avea promesso el “genio”!
... come el park, e l’Arsenale,
come el bus de l’anti-sballo,
o el cimitero verticale,
le colonne d’esse o esse,
de la lirica el rilancio,
el Museo lassù al Romano,
el pareggio del bilancio,
e filobùs, funicolare,
e le ronde militari,
sicuressa a Veronetta
sensa strà-comunitari...
Tute bale preannunciàde
con puntiglio e con costansa,
che però, mai realizàde,
or ne lassa... na speransa!:
come za tant’altri affronti
fati a l’arte, a la cultura,
forse mai no i le farà,
quela insulsa copertura!
Lassemo alora che i giornài
ancora i sèita a contàr bale,
che i ne impìna ancor de fole
contà dèsso in Carnevale,
de zugàtoli e visioni
che i ne fassa un gran zavài...
l’importante è che sto cuèrto
dopo no i le fassa mai!