Le barzelete

“La sai l’ultima?” l’è ’l titolo
de quela sèrta trasmission
in do’ cì conta barzelete
el vien proclamà campion.
Ghe pol ‘ndàr dèsso ’nca ’l Sindaco
che con impeto oratorio
podarà portàr in video
tutto el so gran repertorio...
parché za sèrto in sti ani
el ghe n’ha contàdo tante!,
bele, sporche, irresistibili,
come un vero comediante!
El s’avea un giorno inventàdo:
“Il traforo si farà!
Vedo luce in fondo al tunnel!
State chieti, ch’è realtà!”
Quan’ l’ha dito che in Arena
i avarìa messo su el cuèrto:
“Non son bale! Questa volta
si farà, si fa per certo!”
(e in boresso i veronesi
i se l’ha tosto contàda,
desgropandose i pensieri
co na bela sganassàda!)
N’altra volta: “Se in Lessinia
si prospettan tempi cupi,
presto, armiam le carabine!,
per sbaràrci in costo ai lupi!”
E del so Vice l’avea dito:
“Ha fatto tanto per Verona!”
...come a dir: semo pitochi
se i ghe cava la poltrona!
(e più d’uno, sganassando
assai più che ne le farse,
in un cressendo de boresso
l’ha ris-cià de stofegarse...)
E ogni tanto el conta ancora:
“Filobùs? question di ore!
È già pronto per partire!
Manca ormai solo il colore!”
E ogni tanto el ne riconta:
“Il traforo si farà!
Avrem bus, funicolare,
l’Arsenale sistemà!”
E n’antra volta: “Che m’importa
se hanno i musici le lune?
la Stagione della lirica
la organizzerà il Comune!”
Ma è rivà proprio in sti giorni
la più comica de tute!
no se pol proprio resistar
’vanti a simili battute!
...ché l’ha dito: “C’è ripresa?
In Arena vien la gente?
Tutto il merito, signori,
è dell’ex sovrintendente!”
...e gh’è stà cì è cascà in tera
rugolandose dal ridar...
no i ha fato gnan na piega
solo quei pagà par scrivar!
Ma a sto punto la Giuria
za ha capì, ’vendole lete,
che nessuno l’è più bravo
a contàr le barzelete!