El buseto

I n’avea contà de tuto...
i l’avea sbaràde grosse...
a ogni conferensa stampa
i aveva alsà la vosse:
“Il traforo lo faremo!
Oramai ci siamo, a spanne!
Per tutti gli automezzi
lo faremo a quattro canne!,
con parcheggi accessoriati,
con alberghi e posti letto,
distributori, ristoranti...
quasi regalà, il biglietto!”
Ma i schèi tanto osannàdi
dopo anni... no i gh’è più!
... e pian pian le quatro canne
qua le ne deventa dù!
Ma lori i sèita impavidi:
“Il traforo si farà!
Saran salvi i veronesi!:
basta polveri in città!”
Al so compare ’l Sindaco
ghe dà intanto un pessaton...
e adesso el va a brasseto
con n’antro bindelon.
Ma ammettar più no ’l pol
che i era solo bale...
eco alor n’antra proposta
con tempismo eccessionale:
i ne proclama de sti giorni:
“Sia le canne dimezzà!
Se pol fàrghene una sola!
Sarà el prèsso raddopià!
E gnente Tiri!” (ma i avea dito:
“Sparirà seduta stante
dalle strade di Verona
tutto il traffico pesante”!)
El prossimo so passo
immaginàrlo alor se pol...
i andarà su na spiageta
in baretina, soto el sol,
col costumino verde...
A manina i andarà
a far castèi de sabbia...
la so specialità!
E, soto a quel più grande,
co la paleta e col secieto,
pian pianin, e scava e scava,
i ghe farà un buseto!,
par dopo poder dir
festanti a la città:
“Avìo visto? L’aveo dito!
el traforo... eccolo qua!”