Come el mato Ciroli

Quando uno un fià el scominsia
co la testa a scantonàr,
se preoccupa i parenti
farlo ben ricoverar...
Ma in sti giorni gh’è a Verona
uno che, con far smelenso,
ogni giorno el se ne inventa
una nova sensa senso!
Un bel giorno a l’improvviso,
de traverso andà la sena,
imbugà l’avea proposto
un gran cuèrto par l’Arena...
... po’ de mettar dentro al fiume
un mulino eccessionale!,
illustrando con l’esempio
come far giràr le pale...
Ogni tanto l’idea el lancia
de la “Casa de Romeo”!,
pa’ imbrojàr mejo i turisti
e po’ fàrghe “marameo”!
Ma de falso za g’avemo
za la Casa de Giulietta...
“L’è par quelo! Pensè in quanti
corre a vedarghe la tetta!
S’è par quelo, anca la Tomba
l’è in realtà solo un luamàr!
Ma coltivando l’ignoransa
quanti schèi se pol ciuciàr!”.
E, imperterrito, el vagheggia
un gommone accessoriato,
che su l’Adese el galegia
come el fusse un cabinato!
Un gommon che sul più belo
po’ ghe sponta rude e alette...
così el pol sfrecciàr in strada
come Zero Zero Sette!
Po’ fin su a le Toresèle
l’ha pensà métarghe insìma
na gran statua, un sacranon
ben piantà su la colina!
Fin che, proprio l’altro giorno,
ecco ancora na pensata!
a pié libero el ne annuncia
la so ultima trovata:
cuèrzar ben tutta Via Nova
pa’ un passeggio riscaldato,
come fusse quela strada
dentro un gran Supermercato!
E lu el par, ’ncora una volta,
come un mato o n’imbriagon,
che ogni tanto el dise: “Sìtti!
che mi son Napoleon!”.
Ma i giornalisti, bituàdi
a ossequiàr i caporioni,
i le va a scoltàr seriosi
e i ghe fa gran paginoni!
Ma perché no l’hai salvàdo?
No i avverte anca so mama?
No i le cura in tuta pressia?
No i le porta là a Marsana?
El motivo el me par ciàro:
no ’l g’ha mìa ’rterio-scleròsi,
ma però l’è un Consigliere
eletto ne la Lista Tosi!