Il “bugiardello”

Na mattina de sti giorni
con gran pompa sul giornàl
i ha sbaràdo un titolon
e na notissia eccessional,
che assicurarà a Verona
una gloria duratura:
“Olimpiadi: qua in Arena
la cerimonia di chiusura!”
co la foto suggetiva
de un’Arena illuminàda
da coriandoli de luci
ne la notte più incantàda!
Dopo, sotto, in picenìn,
sol nel cantonsìn più scuro,
te t’incorzi che in realtà
no gh’è gnente de sicuro!:
i sta solo progettando...
ma de vero po’, in sostansa,
te capissi che, al momento,
gh’è soltanto na speransa!
N’antro giorno i ne proclama:
“Senza impegni, senza spese:
Nuovo Stadio pe ’l Verona,
tutto quanto un po’ all’inglese!”
... n’antra nova in realtà vecia,
dìta za continuamente...
un qualcosa poarà nassar,
ma al momento no gh’è gnente!
Eppur diseva la maestra,
dona sèrto competente,
che una frase sensa verbo
no la dise proprio gnente!
... tutt’alpiù la pol servìr
par intorcolàr la gente,
pa’ impenìr tuto ’l giornàl
sol de sogni o ’nca de gnente.
Ma no i conta sol le bale
che i s’ha lori inventà ieri:
anca quele de quei altri
i le mette volentieri!...
come quela che in sti giorni
ha contàdo el Presidente
del Verona, che da un toco
se ne frega de la gente:
“Quando io sono arrivato
– l’ha sbaràdo strafottente –
qua non c’era neanche un campo,
qua non c’era proprio niente!”
(come se anca quel scudetto
no sia stà vinto sul campo,
ma, cissà, zugando a picie,
o magari forse al s-cianco!)
Ma, a l’ossequio abituàdi,
no i g’ha mìga domandà:
stàlo mal? èlo imbriàgo?
qualche bota halo ciapà?
No: i le lassa straparlàr!,
sol zontando le so bale
a le tante che i ne conta
su Olimpiadi, su Arsenale...
El sarà fòrsi par quelo
che po’ dopo, sul più bello,
anca a un nobile giornàl
i ghe ciama “il Bugiardello”!