El candidato

El l’aveva scelto Tosi
pa’ fa’ un giorno l’Assessor:
“Par la delega a lo Spor
ecco un omo de valor!”
Ma g’ave-elo competensa?
... come Toffali a l’Ambiente
o ’l Gironda in Fondassion
(che no i ghe capìva gnente)!
Ma de spòr ’l ghi n’avea fato!:
l’era stàdo, con gran smalto,
un campion de arampicata,
e specializà nel salto!:
salto da sinistra a destra,
po un fià in centro po a la Lega,
po un gran salto fin da Tosi,
pur de averghe na carega!
L’era esperto, fra le altre,
ogni volta che ’l parlava,
anca de... l’arampicàta:
su pa i spèi ’l se rampegava!
Sol che dopo, fin che l’era
Assessor – ahi, tempi foschi! –,
s’ha savùdo che ’l g’avea
par amissi tipi loschi!...
Ma, prima alor che rivelasse
tutto la television,
d’improvviso el s’ha dimesso,
l’è scappàdo a ropeton!
Ma, sol pochi giorno dopo
d’aver dà le dimissioni,
el n’ha dito: “No è mìa vèra!
Pausa l’è de riflessioni!”
S’ha stupìdo i veronesi,
no riussèndo mìa a pensàr
che lu ’l fusse, fra i pastròci,
bon ’nca solo de pensàr!
L’è restà, l’Assessorato,
mesi e mesi sol vacante...
No ’l l’ha più ciamàdo ’l Sindaco,
fin che lu, da comediante,
dèsso el dise: “M’heto dato
e sbutù la porta in facia?
Farò mi ’l Sindaco adesso,
candidato sensa macia!”
E la gente se domanda:
“Ma èlo un scherso? Carneval?
Vollo far Papà del Gnoco?
Come comico, sì, el val...”
Chi lo sa... ma intanto Tosi,
dopo quel... che no l’ha fato
(Arsenàl, traforo e bus...)
dèsso ’l vol ’l terso mandato!
Du el l’ha fati, ma za ’l terso
ha completà la collession:
quando gh’è rivà al so Vice
quelo de... comparission!