Schèrsi de Carneval

L’avea dito un lustro fa,
su par zo de Carneval:
“Serve qua un Sovrintendente?
Ghe l’ho mi l’omo che val!
No l’è miga tanto ciaro
el talento suo primario...
ma, del campo, l’è un esperto!,
parché l’è... perito agrario!”
E par anni el l’ha esaltàdo
magnificando le so gesta...
ma i è adesso sol macerie
tuto quelo che ne resta...
L’ha lassàdo che l’“esperto”
sassinasse ben de bruto
fin la lirica più grande,
che in Arena l’era tuto!...
che’l fondasse “Arena Extra”,
tuto quanto un magna magna,
par portàr dentro l’Arena
fin el pal de la cucagna,
e concerti roboanti,
con gran amplificassioni
che sassìna ben le piere,
e rimbombanti esibissioni...
E po’ “Amo” i ha fondàdo...
“el più bel Museo importante!”
... ma po’, par magnàr de gusto,
i g’ha fato un ristorante...
E, rivàdo el Centenario,
“Sarà l’anno del rilancio!”...
i g’ha dà ’l colpo de grassia
a la lirica e al bilancio...
Dèsso ch’è rivà el Ministro
a catàr su le macerie,
anca lu compunto el dise:
“Qua, butèi, i è robe serie!
Lo so mi quel che ghe vol!
Ghe vol qua un Sovrintendente
che de musica e de conti
el sia un vero competente!”
E la gente, imbidonàda,
stupefatta se domanda
se le robe che i ne conta
Assessori e capobanda
i le annuncia con gran pompa
parché i è robe che val,
o i le dise solamente
parché semo in Carneval...