El mandato

“El scominsiarà in settembre
– i ne diseva – el sfruttamento
del balcone de Giulietta
co l’ingresso a pagamento...”
Ma i è ’ncora là che i pensa
al progetto poco serio
de costringiar i turisti
a passare da Valerio...
o se no, par far più schèi
col tor tutti pai fondelli,
come al Stadio sistemàr
a l’ingresso dei tornelli!
(col pericol che Romeo,
lì rivando lemme lemme,
possa un dì sentirse dir:
Via, via, vi...centin de emme!)
I tramàcia ancora intanto
qua par svendar l’Arsenale,
e no i mola mìa ’l progeto
del cimitero verticale...
Tutti quanti i cittadini
ha dito: no! no lo volemo!
Lu, sucon, el se ne prega
e l’insiste: lo faremo!
No che ’l sia utile o belo...
“L’importante qua, butèi,
l’è che intanto questi i paga,
e noantri femo i schèi!”
... parché questo ghe interessa
de ottegner dai sìti bei:
sensa freni ben sfrutarli
par poder ciuciàr più schèi!
Se l’amore par la lirica
l’è calà, i dise, de bruto,
ecco ch’è rivà el momento
de copàrla ben del tuto!...
così ghe sarà più spassio
par le pignàte, la cucagna,
par i gran spettacoloni...
l’importante è che se magna.
Intanto fra un anuncio e l’altro
dèsso el Sindaco de sfroso
l’ha butà fra i so discorsi
un progetto spaventoso!
L’ha nuncià: “Se un dì par sbaglio
la carega m’avì dato,
mi da qua più no me movo!...
Dèsso voi n’antro mandato!”
Ma, pensando ai “quatro sassi”,
a promesse fate bale,
al massacro de la lirica,
de l’Arena e l’Arsenale,
un mandato solamente
da cì ama la cultura
tutt’al più pol arrivàrghe:
un mandato... di cattura!