El “novo” Sovrintendente

I s’ha incorto, in Fondassione,
del bilancio de sti ani:
za la lirica l’è morta,
parché i l’ha tratà da cani!
È calàdi i spettatori,
gh’è scadente qualità,
e gh’è un deficit pauroso,
un patrimonio sperperà!
... e cancelàdo ’nca ’l prodigio
de quel’arte a tutto tondo,
che faseva un dì Verona
ammiràda in tuto el mondo...
stofegà da “Arena Extra”,
rimbombanti esibissioni,
e sfrattàda, par le prove,
nel gran caos dei capannoni!
Tutti quanti alor: “Bisogna
cambiàr qua ’l Sovrintendente!
Ghe vol uno che de musica
el sia ’lmanco competente!
e de bilanci che ’l se intenda,
che ’l sia fora da ogni bega!,
no uno servo del partito
che pol dàrghe na carega!”.
Ma un dì, dopo tante ciàcole,
da la sera a la mattina,
i ha voltà el butìn in cuna...
e i g’ha messo quel de prima!
E sta spiegassion i zonta
de le frasi al stupidario:
che “l’è esperto, lu, del campo!,
parché l’è... perito agrario!”
E par zonta, anca a la facia
del conflitto de interessi,
a guidàr “Arena Extra”
restarà sempre quei stessi!
E nessuno qua che insorge...
la città no la protesta!
Manca solo che a la lirica
i ghe taja anca la testa!
E la stampa con gran festa
la ne annuncia imboressàda
che sarà presto in Arena
proprio chi l’ha sassinàda!
e i ne annuncia con gran pompa
no la Callas, no Corelli,
ma Bonolis, Carlo Conti,
l’Antonela dei fornelli!...