Pegoroni

Come tanti pegoroni,
varda quanti a cor contento
obbedienti segue sempre
qua le mode del momento!
Quarant’àni fa i butèi
i era tuti capelloni,
pronti a cuèrzare la facia
con frangette e basettoni...
È rivàdo po’ i recini,
somenàdi un poco a caso:
cì se le tacava in pansa,
e chi invesse fin sul naso...
El codino po’ è spuntàdo
pingolante
dal sucon...
dèsso i le strassìna in testa,
e nel mezo gh’è un cocon!
Intanto ieri le butèle,
sia de sera che bonora,
le girava, ’nca col fredo,
col brombrigolo de fora...
Se na volta capitava
ne le braghe un bel sbregon,
mame svelte pareciàva
de gran pressia un bel tacon...
Ancò invesse, par la moda,
quala braga che te usi,
no va ben se no l’è proprio
tutta taj e tutta busi!
Po’ è rivàdo i tatuaggi...
la pareva na sempiàda...
ma gh’è tanti che va in giro
co la pansa pituràda!
E ai cavei bisogna fàrghe
su le tempie la cereta!,
parché i fassa, quei che resta,
su la testa na polpeta!
E bisòn ’verghe, tacà al brasso,
no la man!, ’l telefonìn!,
che ha ciapàdo adesso el posto
del ciuciòto del butin!
I oci sempre là puntàdi
sensa più vardarse intorno,
tutti impavidi se crede
lì de averghe in man el mondo!
...ché sui “social” se pol tuto:
se pol anca cambiar stato,
e far finta d’essar n’ antro,
sconto da l’anonimato!
Fato sta che cì se vanta
da le mode indipendente
senza incòrzarse ’l fa dopo
come tutta l’altra gente:
a inseguir col paraoci
de le mode i caporioni...
tutti in fila, incolonàdi
come tanti pegoroni.