I re del carneval

El Carnevale veronese,
con tuto quel che ghe va intorno,
desmentegàdo l’ha da un toco
el so significato più profondo,
el so ciucio più importante:
na tradission che la s’ha persa
vorìa che fusse, el Carneval,
proprio un “mondo a la roèrsa”
dove ’l pitoco par un giorno
qua el possa farse Re,
torcolando i più potenti,
ridusèndoli a lacchè!
La regola de adesso
l’è invesse de ossequiarli,
e de star sempre più attenti
a mai, mai criticarli!
E i ghe dà la commenda,
la medajeta, el collàr,
e a brasseto con lori
i le invita a sfilàr...
Anca el giorno dei carri,
come dei pegoroni,
par rendarghe omaggio
i ghe va in zenocioni...
E d’altra parte l’è un fato
che no ghe n’è più de lori,
che fassa più ridar
de Sindaco e assessori,
che puntuali ogni giorno,
ogni dì come tanti,
un florilegio i regala
de battùde esilaranti...
I dise: “Il più visto al mondo
è il balcone di Giulietta!”
e “Qua fra poco Celentano
valorizza Veronetta!”
“Non ci importa che la gente
possa qua ben respirare!
L’intento del mobility
è sol quello di educare!”
“Veroninlav è qua per certo
un’inissiativa culturale”
“Tutto è fatto, tutto è pronto
pe’l progetto di Arsenale!”
“Perché quel bando sul teatro
era fatto così male?
Solo dopo abbiam scoperto
che in dicembre vien Natale”
“Ecco qua la soluzione
per innamorar la gente!
Inventato abbiamo adesso
anche il palo intelligente!”
“Sono andato a quel convegno
su le maschere e i pitochi
non perché fosse di destra,
ma sol per magnàr dei gnochi!”
E sentendo ste sempiàde
de cì governa la cità
no se pol che riconossar
quala ormai sia la realtà:
no i è mascare o pajàssi
de sti giorni quei che val:
i è politici e assessori
i veri Re del Carneval!