Le solussioni par l’Arena

Dise ’l Sindaco: “La lirica
no interessa più de tanto!,
e parciò d’ora in avanti
la faremo sempre manco!”
... come a dir: che bel rimedio!
Se malàda l’è de bruto,
tanto vale stofegarla
e copàrla po’ del tuto!
“Ghe sarà così più spassio
pa’ i spetacoli più bei!,
che magari no i val gnente,
ma i ne fa ciuciàr più schèi!”
E, confidando nel silensio
dei so servi in soggession,
l’ha anuncià sensa pudore
n’antra argùta spiegassion:
pa’ giustificàr ’l progeto,
così sempio e demensiale,
qua de cuèrzare l’Arena,
l’ha anunciàdo po’ papale:
“No la serve mìa soltanto
par salvàr ogni serata!...
ma pa’ protegiar ’l monumento
da la pioggia scatenata!”
El l’ha dìto in conferensa...
e, par no rovinàr la festa,
gnanca un can che ghe domanda:
“Ma èlo andàdo via de testa?!”
Sàlo mìa da quanti secoli
che l’Arena la sta lì?
No l’è mìa “sol quatro sassi”
come l’avea dìto un dì!...
L’ha colpìda teremoti,
e dei barbari invasioni,
e burasche, grandinàde,
guere, bombe, inondassioni...
E lo sàlo che i antichi
fin de acqua i le impeniva
par bataglie anca navali,
coi so approdi e la so riva?
L’ha ospità ’n festa ’l prodigio
de cì canta a nuda vosse...
cosa vùto che ghe importa
de ciapàr tri quatro gosse?
Ma è rivàdo el salvatore
a inventàr le solussioni!
... tanto gh’è quei che le scolta
come tanti pegoroni!
E se capisse ben alora
cosa mai che ’l sia el so “Far!”:
far batùde che no inventa
gnanca i mati da ligàr!