I giornài in crisi

I giornài i è tutti in crisi,
i è le vendite crollàde...
I è gran pochi quei che ancora
va a compràr le so sempiàde!
Nissun gh’in sente la mancansa,
e cì no li va più a compràr
tuttalpiù risparmia un franco
e ghe dà un’ociàda al bar...
Gh’è cì dise che la colpa
l’è tuta quanta de la Rete!:
l’è stà Internet, e i so soci,
che i giornài i ha fato a fete!
In realtà, se i sta morendo,
se i ha perso tuti i so valori,
l’è la colpa, a ben vardàr,
tutta quanta sua de lori!,
che, dovendo controbàtar
co sti moderni qua strumenti,
invesse ancor de doparàr
i so più specifici elementi
– la bela scrittura,
la descrission elegante,
l’approfondimento pressioso,
le riflession importante... –,
come tanti pegoroni
i s’ha messo lì a copiàr
el linguaggio de quei altri!,
andando a farse infin copàr:
con titoli e articoli curti
che ’profondìr no se pol,
gran becanoti, fotografìe picenine
de la misura de un francobol...
Ma, co la speransa de vendar,
in più, du tri copie spuà,
na patetica trovata
i s’ha adesso inventà:
“Il “Pallone d’Oro” di casa
andate tutti votando!
Su, comprate il giornale!
Ritagliate il taglaindo!”
E la morosa immagada
del tersìn del Raldon
e la sìa innamoràda
del median del Castion
le se sfida a tagliandi,
a cì gh’incata de più!...
... e registra, le vendite,
du tri copie de più!
Chi alfin vinse el concorso
no l’è el più bravo al balon,
ma sol cì s’ha procuràdo
de tagliandi un vagon!
E i s’ha inventà, de sti giorni,
anca d’una Miss! l’elession!,
che la sia pur da Camacici,
da Soave o Bovolon!
Eccole lì tutte in posa,
sorridenti e spojà!
No vinsarà mìa la più bela,
ma cì più giornài l’ha catà!...
regalando al giornàl
la triste soddisfassion
d’aver aumentàdo le vendite
solo grassie a un galon!