Le Arche al scuro

Dei Scaligeri le Arche,
un gioiel affascinante
che fra i vicoli ne incanta
co la luce de un brilante,
che pol regalar de sera,
soto el ciaro dei lampioni,
con tesori d’arte e storia
sempre nove sensassioni...
dèsso i geni del Comune,
che de tanti so gioièi
ghe interessa solamente
quei che pol ciuciàr dei schei,
che i le ciama addiritura
“quatro sassi... qualche muro”,
i se l’ha desmentegàde...
e i ne l’ha lassàde al scuro!
E, se de note te le serchi
vicinandote pian pian,
con el scuro che gh’è intorno
no te vedi gnanca un can
(e pensàr che ghi n’è tanti
’mortalà da glorie e luti:
lì, fra... i cani de fameja,
i gh’è dentro quasi tuti!)
e te pol ris-ciàr de bruto,
scapussando su na piera,
de sbrissiàr co un rebalton
e finir col cul par tera.
Ghe vorìa ’n poco de amor,
n’illùminassion decente,
ma el Comune indaffaràdo
el continua a no far gnente:
el g’ha tanto da pensàr
solo al presso del bilieto
par vardàr na casa finta
da un insulso cortileto.
D’altra parte, bisòn dirlo,
gh’è un pericolo che incombe:
che i s’incorza che le Arche
struca struca i è le tombe!
Capacissimi qua alora,
de le ruspe co l’aiuto,
de schissàr ben tuti i ossi
e butàrle zo del tuto!,
par seitàr a far progetti
sventolando tante bale,
e po’ impilonarle tute
al cimitero verticale!
La morale de la storia
l’è che... sì, è passado i ani,
ma Verona, come ai tempi,
l’è ancor governà da cani!