El novo Re

Da quando el bon Ginetto
l’ha lassàdo el Baccanal,
sensa sosta i Comitati
i ha tacàdo a barufàr:
de qua quei de la cità
contro la periferia,
de là i quartieri novi
co le beghe de so sìa!
E no i è mìa i grandi temi
el dibattito a ’nimàr:
no le origini, la storia,
le raìse da salvàr...
Sul problema de la droga
la so discussion più bela:
“Ma sui gnochi – i se domanda –
po’ ghe vàla la canèla?”
E i parla de la storia
sensa tanti scondiroti:
“Rievochiamo – i dise – in Piassa
proprio l’invasion... dei goti!”
... Struca struca, no ghe importa
un Carneval de quei più bei...
i baruffa, i Comitati,
solo par spartirse i schèi!
Ma – notissia de sti giorni! –
dèsso par ogni question,
e par ritrovar la pace,
i ha catà la solussion!...
E, dopo tante beghe,
i ha pensà l’altra matina
de affidarghe la gestion
tuta al Sindaco Sboarina!
Ma saràlo proprio adatto
a gestir el Baccanal?
Halo dato po’ in sostansa
referense che le val?
Par cavàrse via ogni dubio
i s’ha alor trovàdo in tanti
par po’ esaminar, del Sindaco,
le batùde più eclatanti.
E i ghe n’ha catà de bele,
sorprendenti e fulminanti,
bone a mettarli d’acordo,
e a convinciar tuti quanti:
“L’avevo ben promesso
prima ancor delle elezioni:
liberato abbiam la Piazza
da troppe manifestazioni!”
“Non c’importa se lo smog
ci continua a soffocar!
Or ci insegnano, sti “dey”,
quanto è bello respiràr!”
“Che c’importa se i banchetti
ci nascondon tutto il bello?
È il balcone di Giulietta
il fior nostro qua all’occhiello”
“Se Veronetta soffre
stofegà da ogni malano,
chieti gente!, che i problemi
li risolve Celentano!”
A sentir tante batùde,
ogni dubio più no val!
sèrto è ’l Sindaco el più adatto
par gestir el Carneval!