La fuga

A vardàr quel che ’l giornàl
dèsso el scrive in ogni dì,
pararìa che ogni problema
d’improvviso el sia sparì:
no se parla più de buse,
de velen da inquinamento,
o del bus sempre in ritardo,
d’Arsenal sempre in fermento,
de la lirica che more,
de le Arche sempre al scuro,
de Giulietta el sfruttamento
co le ciunghe tacà al muro...
El ne conta qua el giornàl,
con i titoli più in vista,
sol le beghe che g’ha Tosi
e cì l’è che ’l mette in lista!
El se vol portàr Venessia
anca tri quatro Assessori
... e che intanto i veronesi
i se rangia da par lori!
Pensàr che solennemente
i s’avea tanto impegnà
de... par sinque anni almanco
lavorar par la città!
e i è pronti adesso invesse
de scapàr via da ste bande
solo par sentàrse sora
na carega un fià più grande!
Che ’l sia fòrsi che i s’ha incorto
che i è stàde un fallimento
tante idee za sbandieràde
sensa gnanca un fondamento?
e che sia na solussion
pa’ i rimorsi che le ruga
qua de corsa molàr tuto
e sercàr na via de fuga?
D’altra parte za da un toco,
fin ancor dai tempi belli,
gh’era stàda là in Comune
za... la fuga dei cervelli!
Quan’ l’obbrobrio verticale
lori in festa i se inventava,
o in Arena i riciamava
cì l’avea za sassinàda,
quando, sensa gnàn pensàr
che de schèi più no ghe n’è,
i seitava a proclamar:
il traforo adesso c’è!,
fin che là su le careghe
lori i stava ancor sentàdi,
za na fuga gh’era stàda:
i servèi... i era scapàdi!