L’ora del Giudissio

Ogni tanto i ne le conta
anca co l’aria un fià giuliva:
“La multa – i ne proclama –
g’ha... funsione preventiva!”
... I fa infati el preventivo
de quanti schèi bisòn ciuciàr,
e po’ i se sparpàja dapartuto
sconti aposta par multàr!
L’altro giorno un gran brav’omo,
pien de fede e de virtù,
pa’ n’incidente el n’ha lassàdo
e qua no ’l ghe torna più...
E, na volta in Paradiso,
spedìo su de precipissio,
el s’ha subito trovàdo
nel gran giorno del Giudissio!
E là el s’ha catà davanti
proprio a la Bontà Infinita,
za là pronta a darghe ’l premio
de quanto l’avea fato in vita.
E circondàdo dai so Angeli
el g’ha dito proprio quelo
che za tante volte in tera
lu avea leto nel Vangelo:
“Te m’he visto che aveo fame
e te m’he dato da magnàr...
g’aveo sé e con tanta cura
te m’he fato dissetàr...
G’aveo fredo, sensa gnente
gnan par cuèrzarme el dedrìo...
ero nudo e con tri strasse
con amor te m’he vestìo...
Sensa casa, da foresto,
te m’he fato un bel aceto:
al caldin te m’he ospitàdo,
te m’he dà parfìn un leto...
Vai, alor, caro bon omo,
va là indove tutti i santi
za coi angeli te speta
co le trombe e inni e canti!”
Ma, fin po’ che lu el se alsa
par andar da tuti i Santi,
ecco un vigile col bloco
ghe se para par davanti!
“El me scusa, ero qua sconto,
e con certessa ho qua apuràto
tutto quel che su la tera
lei ha certo combinato!
Hàlo mìa leto l’ordinansa?
La cità semo dei gnochi...
ma sàlo mìa che l’è proibito
far la carità ai pitochi?
Alor prima de andàr dèsso
là in do l’è sanà ogni piaga...
mi g’ho sto paco qua de multe!
e... bisòn che ’l me le paga!”