El patrono

Quando uno un giorno el more
e ’l sparisse un dì de bruto,
tante volte quei che resta
i pol farghe dir de tuto!
I ghe attribuisse storie
de cui gnanca ’l s’era incorto,
e i ghe fa po’ dir de tuto
profittando che l’è morto!
Pur de quel che in vita l’era
anca un poco lazzaron,
i pol dirne: l’era onesto,
giusto, retto, probo, bon!
E, a seconda che ghe comoda,
i ghe cambia convinsioni,
idee, fatti, sentimenti,
frasi, detti, affermassioni!
Del gran Sespir par esempio,
visto che così el funsiona,
i ne conta: l’èra proprio
immagàdo de Verona
quan’ l’ha dito: fuor di qua
altro mondo no, non c’è...
quando po’ in realtà a Verona
no ’l g’avea mai messo pié!
Ma par rendar più sicura
e veritiera la busìa,
inventà i ha ’dirittura
i più falsi che ghe sia:
un balcon che l’era solo
na casetta col comò,
una tomba che, a vardarla,
l’era sol l’arbio dei bò!
E eco ancò l’altra notissia:
Pa’ Giovanni, “il Papa buono”,
sensa dìrghelo i l’ha eletto
de l’Esercito patrono!
Proprio lu che co i so scritti
“pace in terris” avea invocà,
che la guerra detta “giusta”
l’avea, serio, condannà!...
che, vardando a tuti quanti
con umanità e passiensa,
l’avea vèrto fin le porte
a l’obiessione de cossiensa!
Sèrto tutti g’ha diritto
a na santa protession...
ma no è giusto po’ stravolgiar
le più amate convinsion!
Lu el g’aveva così tanta
comprension e gran bontà
che ’l perdonarà anca chi
sta sempiàda l’ha inventà...
ma la so imagine de pace
dov’èlo intanto che i le mete?
imortalàda sui santini
tra fusìli e baionette!