Na fola de ancó

Gh’era na volta ne la bela Verona
na vecia Signora nobile e bela,
che l’era de casa dentro un palasso
tuto rotondo, formàto scudèla...
Signora “La lirica” i ghe ciamàva,
e casa sua (proprietà comunale...)
pa’ i so spettacoli l’era rivàda
in più de sent’ani a na fama mondiale!
I vegneva a trovarla da tuto el mondo,
tutti immagàdi dal gran incanto
che ghe regalava, sotto le stele,
l’arte sublime de musica e canto!
E, dapartuto, i ha tutti imparàdo
dove l’Arena l’era stàda piantà...
e, grassie a ela, famosa nel mondo
anca Verona l’è così diventà!
Ma un bruto giorno rivà gh’è davanti
na buteleta ancora in bombasa,
che ghe domanda, un fià impertinente:
“Posso anca mi qua occupàr la to casa?”
Mai più la pensava, poareta, la vecia,
che quela tosa sarìa stàda uno shock...
la g’avea intorno butèi scalmanàdi...
i ghe ciamava “La Musica Rock”...
La siora La lirica ha pensà: par na olta...
e “Va ben, ma par poco” g’ha subito dito
... ma la scominsiàva za diventàr vecia,
e la fadigàva a pagarse l’afito...
La Rock invesse, alsando i volumi,
sbaràndo le luci e i tamburi più in su,
l’ha scominsiàdo a attiràr spettatori
a folle, scaenàdi, sempre de più!
S’ha catà, alora, la pora vecieta
in poco tempo emarginà pian pianin...
sol confinàda a provàr la so Arte
nel cupo rimbombo de un bel sgabussìn!
... Fin che in sti giorni qua, par l’Arena,
è rivà finalmente i so novi paroni,
che, par risolvar lì tutti i problemi:
“Abbiam rinnovato le programmassioni!”
E festosi i annuncia davanti a la stampa
– sìtti, silensio, che ’l Sindaco el parla –:
“Se in Arena la lirica adesso è morente,
sarà la Musica Rock infine a salvarla!”
... Insomma, a sentir sto solenne proclama,
dovarìa po’ a la fine salvarla – ma va! –
proprio la stessa che in tutti sti ani
l’ha prima sfrattàda e po’ sassinà!
... ma del Sindaco la frase
chissà mai quanto la val:
i l’ha nominà in sti giorni
Comendator... del Carneval!