Appelli e fondelli

Se lo scopriva andando in Piassa
– bastava sol vardàrse intorno –
che ’l candor de na butìna
el pol smovar tuto ’l mondo!
I s’ha catàdo in sinquemila,
in diesemila, soto el sol,
butèi, done, buteleti
con in alto el barbisol
par unirse tutti insieme
a l’appello preoccupàdo
sigà da na buteleta
par sto mondo invelenàdo...
tuti a illuminàr la Piassa
co entusiasmo e convinsion,
insustàdi de speransa,
e de sogni e de passion!
E dai ànemi, e dai cori,
gnente insulti!, na preghiera:
che se daga infin na mossa
i potenti de la tera!...
par salvàr sto vecio mondo,
e dapartuto ancor la gente
possa ognor goder par ani
dei tesori de l’ambiente!
E la più bella gioventù,
in na giornàda come tante,
la n’ha regalàdo intanto
sta speransa entusiasmante...
Senonché po’ sul più belo,
attiràdi dai clamori,
è rivàdi a farse vedar
anca Sindaco e Assessori...
“Bravi bravi – ha dito el primo – Siete bravi, siete belli!”
... ma parea, le so parole,
più na presa pa’ i fondelli...
“Difendiam tutti l’ambiente!
Però, intanto, fate voi!”
... come a dir: fasì voialtri
quel che non facciamo noi...
E i Assessori “competenti”
pronti è corsi a far comparsa!
... proprio lori che par mesi
i s’avea inventà la farsa
de le domeniche “senz’auto”
da le auto invelenàde,
co le so ridicole eccessioni,
le periferìe intasàde...
“E ora, scelte coraggiose!”
i ha proclamàdo in facia al vento
... lori che se le fa in braghe
prima d’ogni so intervento,
che a Nadàl i avea sospeso
ogni norma proclamàda
proprio quando tuta l’aria
l’era ancor più invelenàda!
“Ora, scelte coraggiose!”
i ha ribadìdo de so posta,
orgogliosi e sodisfatti
za del Premio “Facia Tosta”
... e, come sempre indiffarenti
a la salute de la gente,
i è rientràdi in Municipio
par tornàr a no far gnente.