Le novità de l’anno novo

Dopo giorni de vacansa
el giornàl me son comprà
par saver, de l’anno novo,
quale i è le novità.
“Abiamo ’l fìlobus! – i anuncia –
Finalmente l’è rivà!
Ecco quel che, pien de gente,
sfrecciarà par la città!”
E a supporto gh’è na foto:
Tosi co un zugatolìn...
“Ecco il fìlobus!” i scrive...
ma l’è solo un modelìn!
E proprio come l’anno scorso,
del ridicolo a disdòro,
i ne annuncia che sto anno
“sarà l’anno del raforo!”
E i ne annuncia che nel mondo
tanti za se dà gran pena
pa’ inventàr l’ombrèla giusta
e po’ cuèrzare l’Arena!
Intanto Tosi anca sto ano,
i ne annuncia con gran ciasso,
el s’ha tuffàdo dentro al lago,
incurante se gh’è ’l giasso!...
e pa’ le speranse tosto nate
l’è stà solo tempo perso,
parché ’l Sindaco anca st’ano
a la fine l’è riemerso!
E i ne annuncia po’ che ancora,
“al potere abituato”,
con la Lega o col so “Fare”
dèsso el vol n’antro mandato!
e gh’è za chi, ripensando
a le tante bale spese,
co un mandàto el le contenta
... e le manda a quel paese!
E po’ i scrive che l’è, Setti,
bello, acuto, intelligente,
alto, intrepido, elegante,
e l’è un grande Presidente!
No ne importa se al futuro
gh’è un’incerta prospettiva,
o se ’l n’ha portàdo in B...
ma el n’ha dato l’esclusiva!
E i ne annuncia che gh’è ’l smog,
che de smog se pol morìr!...
che però quei del Comune
se ne impìpa de sentìr
quanto mal, quante disgrassie
pol vegnérghene a la gente!...
e, strafottènti, ha za pensàdo
de seitàr a no far gnente!
Lezo, penso, e son confuso...
no so più dove me trovo...
No capisso parché a st’ano
i ghe ciama l’anno... novo!