La nova pensata

I n’avea sempre contàdo,
quei che odia i “quatro sassi”,
che bisòn cuèrzare l’Arena
par salvàr “tutti gli incassi”!
Ma varìa la pena alora,
gh’emo dìto za al momento,
de butàrla zo del tuto
e po’ rifàrla de cemento!
I ha provàdo in pressia alora
a cambiar motivassion...
dèsso i dise: “Serve ’l cuèrto
par far la manutension!
parché ormai l’è invelenàda
anca la pioggerellina...
e al Comun ghe costa un ocio
se le piere le sgossìna!”
Ma se dovrìa cuerzar alora
anca el Domo e tutti i scavi,
el Romano, e Castelvecio,
l’Arche, e l’Arco quel dei Gavi!
Fatto sta che i è riussìdi
con gran pompa a far el bando,
e proclamàr: “La cuerzaremo”,
anca sensa mai dir quando...
E, profitando del momento,
i saon de la cultura
i ha zontà n’antra sempiàda
a l’insulsa copertura:
l’incredibile pensàta
lì butàda a scotadeo
l’è... individuàr na casa
e dìrghe: “Casa di Romeo”!,
far na bela propaganda
par portàrghe lì i turisti,
e spilàrghe po’ altri schèi
a ignoranti e poricristi!
Ma ’l sarìa sol n’antro falso!,
n’antro imbrojo che ne speta!
Za de falso qua a Verona
gh’è la casa de Giulieta!
E l’è falsa ’nca la tomba
che in realtà, ti pensa un po’,
l’è un seciàr abandonàdo
che ’l fasea d’arbio dei bo!
“Sì, l’è vèra: tuto falso!
Ma ghe casca tanta gente!
Se ghe ne inventemo n’antra,
femo i schèi alegramente!”.
È diventà, così, ufficiale
cosa sta Amministrassion
or la intende par cultura:
far de Verona... un baracon!,
par intorcolàr la gente
scominsiando dai servèi...
co attrattive tute false
par ciuciàr sempre più schèi!