Le promesse dei barbari

Sensa più pudor i barbari,
co incursioni de scondon,
i continua, descaenàdi,
ne le so devastassion!
De sti giorni con ferocia
d’improvviso i ha copà
na ventina de bei lecci
longo l’Adese schierà,
che un pocheto i difendeva
dai veleni lì sbaràdi
da le macchine scaenàde
coi so tubi infumegàdi...
che fasea de quel Lungadige
el più belo de Verona!...
ché parfìn el Ponte Piera
a vardàrlo el se emossiona...
un canton quasi da sogno
za sparìdo a l’improvviso,
devastàdo e impoverìdo
sensa un strasso de preavviso!
E, che ghi n’ha fatto stràje,
l’è la stessa perversion
che za avea copàdo i platani
su la circon-vallassion!,
che avea condannàdo a morte,
con protervia demensiale,
vintisinque ippocastani
bei giganti a l’Arsenale,
scancelando un bel boscheto
sconto là in centro città
progettando de ridurlo
da vetrate imprigionà!
Fato adesso sto disastro,
al cittadino za sgomento
or par mettarlo a tasèr
i g’ha dìto in t’un momento:
“Ma parché vi preoccupate?
Di alberelli, chieti gente!,
ghe ne piantarem de novi
entro un mese, immantinente!”
Ma a prometterlo i è i stessi
che, con far da spùa-sentense,
za da un toco fa proclami
scrioltolando le scadense:
“Fra tre anni la tramvìa”,
“Via al traforo za entro un mese”,
“Parte il filobus fra poco...
tutto a posto con le spese!”,
“Entro un anno sarà pronto
il restauro all’Arsenale”,
“Se lo smog sèita a far morti,
li impilemo in verticale!”,
“Nassarà qua fra dies’ani
un gran Polo culturale!”,
“Entro – massimo – tre mesi
parte la funicolare!”
Fatto sta che i cittadini,
stufi d’essar bidonàdi,
sensa più quel panorama,
impoverìdi, invelenàdi,
sentendo dir: “Sì, entro un mese”
proprio cì ha fato ’l malano,
i pol solo domandarse:
“Sì, va ben... ma de che ano?!”