La previdensa

Se dise che i politici
dovarìa essar previdenti,
conossar ben i tempi
de progeti e intendimenti...
In realtà quel che succede
ormai lo savemo ben:
tutto quelo che i promette
mai na volta i le mantien!
I n’ha dìto mille volte,
sensa mai far ben i conti,
“Quel piassàl, el tal parcheggio
entro l’anno i sarà pronti!”
I avea dìto, sul Museo:
“È questione sol di ore”
L’anno scorso, po’, sul fìlobus:
“Manca ormai solo il colore”
“Sol vent’anni e poi vedrete
l’Arsenale sarà pronto!,
con parcheggio incorporato,
sensa gran macie di onto!”
“Basteran solo due anni
pe’ un progetto eccezionale:
nascerà in quattro e quattr’otto
il cimitero verticale!”
Tutte sol promesse al vento...
tutti tempi sbalinàdi,
tante volte proclamàdi,
mai na volta rispettàdi...
Sarà forse pa evitàr
altre bale scrioltolà,
che n’incredibile pensata
l’altro giorno i s’ha inventà!
“Entro l’anno – ha dito ’l Sindaco –
la funicolàr sarà realtà!”
(sensa dir però sta fine
de che anno la sarà...)
Beh, a sto punto i gran saoni,
co impudensa sensa pari,
stabilì i ha e pubblicàdo
tutti i pressi e ’nca i orari!,
de partensa e anca de arrivo
de qualcosa... che no gh’è!,
con i sconti, e ridussioni
par cì vol andar a pié!
A sto punto se spetemo
che i ne comunica par sèrto
anca el presso del bilieto
par vardàr l’Arena al cuèrto...
pa’ infilàrte prenotàdo
dentro ’l tunnel del traforo,
par dormìr su na panchina
sensa offesa pa ’l decoro...
par magnàr al Ristorante
che gh’è dentro a l’Arsenale,
e po’ prenotàrte un loculo
al cimitero verticale!