In pressia, de scapon

“Entro Pasqua – i n’avea dìto –
certo si inaugurerà
quella gran funicolare
che sovrasta la città!”
I l’avea za promessa
da anni, mesi, tanto tempo...
ma è rivàdo puntale
pronto n’antro slittamento!
... com’è stàdo pa ’l traforo,
el cimitero verticale,
come el bus de l’anti-sballo,
come el tram e l’Arsenale...
come tante idee balenghe:
la tettoia par Via Nova,
come el cuèrto de l’Arena
ché dal caso no ghe piova...
come i giri de le Ronde,
d’esse-o-es la centralina,
i motoscafi dentro ’l fiume
o la statua su in collina...
e decoro, e sicuressa,
emporio de la carità,
le panchine co la sbarra
par svejàr chi s’ha sentà...
Tutte robe za promesse
preannunciando na scadensa
che po’ slitta sul più belo...
e Verona resta sensa!
Sicché adesso el novo stemma
– che te vardi a manca o drita –
dovrìa essar, par Verona,
no la scala, ma... la slitta!
Tutti infine s’ha inacorto:
l’amministrassione uscente
de ste robe, a dirla tuta,
no l’ha fato proprio gnente!
L’è par quelo che in sti giorni,
de gran pressia, de scapon,
i s’ha messo tuti in fregola
co na grande agitassion!...
E i propone ognor de corsa
gran delibare in scadensa!
Ghe vorìa un attento studio...
“No, no! In pressia! Femo sensa!
Gh’è quel project, la fusion,
qua se tratta de contanti!”
Importante è far in pressia,
farse vedare operanti,
farghe credare a la gente
che i è sempre lì a laoràr,
par noantri!, e tutti quei
che fra poco andrà a votàr!...
E ogni giorno adesso i core
pronti a inauguràr... na busa,
un tombin, un albareto,
na cantina, na cambusa...
mejo se un supermercato,
che se impìna ben de gente:
sassiniam la tangensiale,
ma salvemo la tangente!
E ormai resta in Municipio
solo i segni del disastro:
no se trova più, a sercàrla,
gnàn ’na fòrbese col nastro!