Le olimpiadi

I fa a gara, i candidati,
in campagna elettorale,
de contàrle ognor più grosse,
mescolando sogni e bale...
In sti giorni a l’improviso
na trovàta proprio bela,
sussitàndo sganassàde,
s’ha inventà la Bissinèla:
p’assicuràr continuità
a quel’Amministrassion
che promesso avea ’l traforo,
el filobùs, el statuon,
el decoro e la tramvìa,
la copertura, l’Arsenàl,
el bilancio giusto in pari,
el cimitero verticàl,
e le ronde, e po’ la rùda,
sicuressa par la gente,
i gran bus de l’anti-sballo,
... e po’ no l’ha fatto gnente,
la s’ha inventàdo la proposta,
butà là così a la bona,
de portàrne, nel... tremila!,
le Olimpiadi qua a Verona!
L’è na roba che no esiste!...
L’è za stà assegnà la sede...
a Parigi, o in Papuasia...
Qua? Mìa nessuno no ghe crede!
Ma ela sèrto la confida
che nessun ricordarà,
quan’ sarà passàdi anni,
tutto quel che l’ha contà...
e al momento la se gode
de vantàr tuti quei spòr
che i politici de casa,
specialisti, i fa col cor:
i fa i cento metri... piano
(i fa tutto sempre a pian!),
el salto da una parte a l’altra,
e po’ el lancio del cancan,
e anca el lancio de la bala
(ogni giorno i se ne inventa:
de contàrghene de nove
ogni dì no i se contenta),
e po’ el tennis che a la gente
ben giràr fa le balete
sol lassàndoghe ’l conforto
de tiràr quatro rachete...
e po’ el lancio de promesse
par i butelòti, i veci,
e po’ infìn l’arrampicata
ogni giorno su pa ’i spèci...
Ma l’è solo co sti spòr
che sognàr se po’ a la bona
che un bel dì possa rivàr
ste Olimpiadi qua a Verona!