Da Roma per Verona

Gh’era un titolo balengo
l’altro giorno sul giornàl,
inventà de sana pianta
par parer più original!
Parlando dei disdòto
diventà parlamentari,
i l’ha messi tuti insieme
– i nemici e i so compari –
par farghe dir a tutti quanti,
schissà in coro un po’ a la bona,
l’anuncio: “Ecco ’sa faremo
or da Roma... per Verona!”
No i l’ha mìa dito in verità,
tanto manco tuti insieme...
el se l’ha inventà el giornàl:
no l’è questo! che ghe preme!
E in realtà l’è un’illusion
che cì s’ha sentà in poltrona
i sia là sol par risolvar
i problemi de Verona...
Te vien’ mente sol na fola,
la più stramba che ghe sia,
ambientà, così a la bona,
in ’na città de fantasia:
gh’è ’l Berlusca che risolve,
impomatàdo e sensa scuse,
con le rughe ben stiràde,
el problema de le buse!
Gran esperto po’ del ramo,
imbelletàdo con passion,
el risolve in du e du quatro
quel de la prostitussion!
Gh’è Salvini che se gusta
le panchine co la sbàra,
con quei tubi che, ingiassàdi,
ponze come na zanzara...
fati aposta parché i resta
con le strìssie!, i tafanari!,
parché sia riconossìbili
tutti i strà comunitari...
E Di Maio col sorriso
e la spussa sotto el naso
che ’l ripete che in Comune
no l’è mìga lì par caso,
e col so deolìn alsàdo
tuto el giorno ’l sta a spiegàr
tutto quel che qua va fato...
e po’ no ’l sa più cosa far!
E po’ al Traffico gh’è Rensi
che ’l se perde andando a piè...
tanto, mai l’ha ben savùdo
la sinistra cosa l’è...
E grassie proprio a sti disdòto
tutti bega e se tontona:
el Parlamento sol patisse
pa ’l rilancio de Verona!
Tutto questo, se capisse,
l’è soltanto fantasia...
a noantri, picenina,
na speransa bastarìa:
che i fasesse el so dover
sensa tanti paroloni,
sensa mai più somenàr
tante inutili illusioni.