El stadio novo

Imboressà parché ’l Verona
l’è tornàdo in serie A,
dèsso el Sindaco e i giornài
l’un co l’altro i s’ha insustà,
e par tutta settimana
i ha sbaràdo tutto intorno
con gran foto e titoloni
le... gran novità del giorno:
“Verona: ecco il nuovo stadio”
“Una città da serie A”
“Nuova Arena per Verona”
“È lo stadio una realtà”...
E bei disegni colorati
za ne illustra quel che gh’è:
supermercati, ristoranti,
pisserie, bistrò, caffè...
e asili pa’ i butìni,
a teatri e discoteche,
e palestre, conferense,
pianobar e biblioteche...
in do’ te pol catàr de tuto:
la massaia a far la spesa,
el marcantin, el frutarol,
la pitoca e la marchesa!
’Soma: un canton de smaraveje!
na descrission mirabolante!
... senonché, proprio a la fine,
gh’è na frase più inquietante...
“In cauda” c’è il “venenum”!,
el latin ’nunciàva za...
e ecco qua l’ultima riga
che te lassa sensa fià!
Proprio in fondo a ste notissie
dà con tanta esaltassion...
“La palla passa or’ al Comune”
i ne annuncia in conclusion!
... E de colpo l’entusiasmo
de traverso za l’è andà!
ripensando, de sti ani,
a tuto quel che i n’ha contà,
ai progetti tante volte
con gran pompa za anunciàdi,
illustrà, lodà, esaltàdi,
e po’ là desmentegàdi...
ripensando a l’Arsenàl,
al Museo lassù in collina,
al filobùs che mai no parte
a tutta l’aria che ne inquina,
a Giulietta sluamaràda,
a le buse in ogni via,
a Veronetta sassinàda,
al traforo, a la tramvìa...
E te capissi che anca st’altro
el sarà forse solo un sogno
(d’altra parte, de bel altro
sta città g’avrìa bisogno),
che a tuti quei che ne governa
po’ i ghe serve, sti proclami,
a far sì che i cittadini
se desmentega i malani!
E riscominsiàdo i ha ’l zugheto
de annunciàrne fate za
de le robe che po’ invesse
cissà mai quando i farà!