Le nove radiocronache

I veronesi za da un toco
i le ciamàva “Il Bugiardello”...
i saoni addirittura
“di gran bale servo e ostello”,
pa’ i so scrivàni sempre pronti
a riportàr chieti, ossequienti,
quel che da lassù comanda
i paroni e i più potenti...
De le volte ’nca i se offende,
sta nomèa i ne le contesta...
ma eco adesso la conferma
de sta dicerìa molesta!
Pa’ ritrovàr ’ntusiasmo,
e desmentegàr malinconìe,
la Radio ha domandàdo
de trasmettar le partìe.
Ma gh’è adesso un Presidente,
a la moda e pien de boria,
che del nostro bel Verona
no ’l conosse gnan’ la storia:
l’avea dichiarà na volta
che l’è stà fondà dai greci!,
sconvolgendo, fra i tifosi,
specialmente quei più veci...
“Abbiam radio e ristorante!”
el vantava un dì contento...
Pian pianìn el l’ha portàdi
tutti du zo al fallimento!
El invoca sempre “amore
per i nostri bei colori!”...
po’ el le cambia a vateciava
somenando sol dolori:
el s’ha inventà na maja nera
sensa giallo e sensa blù,
e po’ n’antra verde vomito
color giallo butà su...
e po’ st’ano, addirittura,
forse pa’ un presentimento,
l’ha copià quele del Parma
ai tempi del so fallimento!
“Radiocronaca? – l’ha dito –
Podì farla, se volì...
Ma però el radiocronista
dopo me lo selgo mi!
No voi vedar gnan’ par sogno
– l’ha zontà con sguardo fiero –
no voi mìa sentìr quel tale
che fa rima con sincero!”
“Ma... l’avea cantà el scudetto!
E la gente lo vol lì...”
“Me ne frego! Son ’l paron!
Dèsso qua comando mi!”
E quei altri, abituàdi
a accettàr imposissioni,
no i l’ha mìa mandà a remengo,
ma i s’ha messo in zenocioni!
E l’informassion ancora
la sarà s-ciàva e pilotà...
or le nove radiocronache
ecco come le sarà:
no le sarà mìa un servissio
par i amanti del balon,
solo un “vile servo ossequio”
ai comandi del paron!
E, a sigàr eventualmente
“Rete, reteee... alè alè”,
no sarà mìa più un cronista,
ma soltanto un lecapiè!