I nostri colori

El zugo del balon
el dà palpiti e tormenti...
el regala tante storie,
el ne smissia sentimenti...
Sì, va ben, l’è solo un zugo...
ma stampà ne la memoria
gh’è speranse e sogni in festa
che ha impenì la nostra storia.
Ma, coi tempi, l’è cambiàdo
anca el mondo del balon:
sensa i veci sentimenti,
è rivà novi paron!
E te i senti parlàr solo
del management, del trend,
e del business, del staff,
del merchandissing, del brend.
L’è così ch’anca a Verona
gh’emo adesso dirigenti
ch’è rivàdi da un paesoto,
ma i ne crede incompetenti,
e no i è stà mossi sèrto
da l’amor par quei colori,
ma par dirne che’l balon
i se l’ha inventàdo lori!
Prima ancora de vantarse
de un tersìn, de un atacante,
i ne conta con orgoglio:
“Ora abbiamo un Ristorante!”
Una Radio i vol ’bediente,
non importa da che banda:
basta solo che cì parla
sia ossequiente a cì comanda!
No ocor mìa che la ne conta
la partìa come che l’è:
basta sol la sia obediente
e anca un poco lecapiè!
E, convinto, el Presidente
el fa sussultàr i veci
dichiarando che ’l Verona
l’è stà un dì fondà dai Greci!
Dèsso po’ con grande pompa,
fotografàde in ogni dove,
presentàdo i ha in sti giorni:
ecco qua le maje nove!
Una l’è gialo smarseto,
co un verdin missiàdo su...
l’altra nera come in lutto...
gnanca un cincinìn de blù!
E noialtri tornaremo
a spartìr gioie e dolori,
come sempre tutti insieme
a palpitàr par quei colori...
Ma la sarà sempre più dura
con quel giàlo sensa el blù,
con quel colorin petrolio,
quel verdino “buta su”!...