Le correnti le sùpia ancora

I era quei de la Diccì
una volta i più potenti...
però, dentro nel partito,
dominava... le correnti!,
no parché i lassasse sempre
tutte le finestre vèrte
e da lì passasse spìffari
da mandàr sotto le cuèrte...
ma parché i era, le correnti,
gruppettini, grupi, sette,
che ’l potere i controllava
e i se le spartiva a fette!
La Seconda, po’, Republica
un bel giorno l’è rivà,
e i n’ha dito con gran pompa:
adesso tutto cambierà!
Ma, a vardar quel che succede,
ciàro l’è immediatamente
che anca adesso, ’nca a Verona
no l’è mìa cambiàdo gnente!
Anca adesso qua in Comune,
anca dentro maggioransa,
gh’è gruppetti e gruppettini
che se sburta in abondansa:
gh’è “Verona” qua “pulita”,
de là “Civica” e “Domani”,
associassioni, movimenti,
e gh’è “Battiti” e i Tosiani...
e baruffe, acordi, cariche
i se spartisse fra de lori,
doparando el bilancin
e scambiandose i favori!,
miga in base a quel che serve
o che interessa i cittadini,
ma par combinàr fra lori
spartissioni e contentini!
De sti giorni, par esempio,
par che dèsso, sotobanco,
i abia concordà fra lori
de far ben saltar un banco:
proprio quel de la Cultura!,
e, a la faccia dei “domani”,
de cavàrghe la carega
de assessora a la Briani!
I dise: “La g’ha i giorni contà!
No se sa quanto la dura!...”
... e chissefrega se po’ intanto
l’è vacante la cultura!
...sì, l’è vèra, fra i artisti,
no l’ha mai scoltà nessun,
e al so posto, par coerensa,
se pol metarghe... nissun!
Ma no l’è mìa sèrto el modo
de servir ben la città,
de valutàr ben, de la gente,
el valor, la qualità...
E insoma no è cambiàdo gnente:
sùpia sempre la corrente!
Dèsso sol na diffarensa
l’è ormai l’unica evidente:
è cambiàdo l’obiettivo
or che domina la Lega:
l’era, prima, la poltrona,
dèsso invesse... la carega!