Cambiamenti e giramenti

Una novità importante
par che riva dal giornàl!
I le annuncia con gran pompa,
co un rilievo eccessionàl:
gh’è un paginon gigante
che ne annuncia cambiamenti!,
e de tutti i consiglieri
ne rivela i spostamenti:
gh’è cì passa imantinente
(“vado via, più no resisto”)
or dai “Battiti” ai “Fratelli”,
da la Lega al Gruppo Misto,
da “Amar Verona” a “Far Verona”...
tutti i salta ardimentosi
da le civiche ai partiti,
da “Pulita” a Lista Tosi...
Tra gruppetti e sottogruppi
gh’è un continuo spostamento...
el par quasi un teremoto...
par che i cambia el sentimento!
Ma, dopo aver ben impenìdo
el paginon completamente,
i ne annuncia che, in sostansa,
no è cambiàdo proprio gnente!
I è a la fine sempre i stessi
a guidàr l’Aministrassion...
tutti i altri, in pié o sentàdi,
resta là a l’opposission!...
... parché ’l vero cambiamento,
l’obiettivo dichiarà,
l’è a la fin solo sentàrse
in Consiglio un po’ più in là!
I ha, d’altra parte, tribulà
par brincàr quela poltrona...
dèsso quel che ghe interessa,
più che l’emergense de Verona,
l’è catàrse, là in Consiglio,
na carega più decente!,
un postesìn un fià più comodo
ai amissi sempre a rente!
In realtà l’è, el cittadino,
a sti zughi indiffarente:
de sto terremoto insulso
no ghe importa proprio gnente!
Ghe bastaria che i se spostasse,
qua i nostri caporioni,
sol tra n’emergensa e l’altra,
par catàr le solussioni
par l’Arsenàl che casca in tochi,
el Camploy desbandonàdo,
el filobùs che mai no parte,
el balcone sluamaràdo,
l’ignoransa che circonda
tutti quei che fa cultura,
la tendensa a pensàr solo
che la poltrona la ghe dura,
e quel direttore artistico
qua da mesi za anuncià
che, fra dispeti e scondiròti,
cissà quando el rivarà...
Ma dopo infìn tuti sti scambi,
tante bale e tante beghe,
sol ghe resta, ai cittadini,
... un giramento de careghe!