L’abitudine

De sti tempi, ormai da un toco,
con puntiglio original
n’abitudine curiosa
la s’ha imposto sul giornàl:
ogni volta che la Giunta
ciàpa qualche inissiativa,
fa un progetto, na promessa,
la sia vaga oppur gualìva,
ogni volta che qualcosa
el ne annuncia un Assessor,
presentando anca, par farla,
tutto quelo che ghe ocor,
dopo aver dà la notissia
bela in grande spampanà,
i ghe ne zonta tosto n’antra
lì darente, lì tacà:
prontamente i giornalisti,
ossequienti e rispettosi,
svelti i core a pubblicar
anca l’opinion... de Tosi!
... che, se sa, tutte le volte,
proprio immancabilmente,
el sentensia: quei de adesso
no i è boni de far gnente!
No i fa gnente, i sbaglia tuto,
i tien ferma la città!...
No i sa gnanca cosa i dise,
no i ghe pensa a quel che i fa!
E co impavido coràjo
el le accusa sempre più
no essar boni mìa de far
quel che... no l’ha fato lu!,
che par dies’ani avea promesso
el traforo, l’Arsenale,
un bel cuèrto par l’Arena,
el cimitero verticale,
grandi bei supermercati
con valanghe de cemento,
l’Ente Lirico in pareggio,
sicuressa ogni momento...
L’è un po’ come domandàrghe
n’opinion sui monumenti
a cì vorìa sol sassinarli
pa’ umentàrghene i proventi!...
o domanandàrghe de quel guasto
al motor come che l’è
a cì no l’ha mai guidàdo
e che ’l gira sempre a pié!...
Parché alora sta tendensa
se in sostansa po’ a la gente
de quel che dise ’l vecio capo
no ghe importa proprio gnente?
L’è par via de n’abitudine
ormai ben consolidà:
le notissie, par dies’ani,
l’è stà lu che ghe l’ha dà!,
che ghe diseva ogni matina
cosa scrìvar, cosa dir...
e lori, soto dettatura,
sempre pronti là a servìr...
Fato sta che dèsso i ris-cia
fàrghe far, sol dopo un po’,
la figura de quel beco
che disea “cornuto” al bò.