La pena

M’era capità na volta,
e diventà po’ abituàl,
d’andàr metar dentro ’l naso
ne la redassione d’un giornàl.
L’era alor n’ambiente vivo!,
e vivace, imboressà,
allegroto, bagolone,
m’anca serio e preparà.
Tutti i se spartìa l’orgolio,
presuntuosi e fati scaltri,
de saver quel che succede
sempre prima de quei altri.
Gh’era el critico teatrale,
che con prosa assè ’legante
el podea cavàr la pèle
anca a questo o quel cantante,
che però i le rispetava!,
i le temea con riverensa,
ben savendo che ’l scriveva
con na vera competensa.
Gh’era quei detti “d’assalto”,
sempre pronti e mai, mai stufi
d’anda’ in serca de notissie
come cani da tartufi:
i se infilava dapartuto,
sempre a l’erta, sempre pronti
a scoprir i scondiroti,
a svelàr segreti sconti.
E, tornàdi in redassion,
ai colleghi i le contava...
fra polemiche o entusiasmi
tuti insieme i ragionava!
Son tornàdo l’altro giorno
in na nova redassion...
gh’era solo un gran silensio!
Tutti col so servelon,
tutti co le so cuffiete
al computer par vardàr
quale i era ogni momento
le notissie da copiàr...
Ancoràdi a la carega,
sensa più ’l fogo che vampa,
i se alsa qualche volta
sol par conferense stampa,
in do’ medriocri autorità
ghe comanda sul più bel
cosa scrivar po’ ubidienti,
dove lassar zo el servèl...
No ocor mìa che i sappia scrivar,
no gh’è più letteratura...
È restà solo un impegno:
scrìvar sotto dettatura!
Doveo dìrghe du parole
a un cronista ch’era là...
Tuto intento al so schermeto
no ’l m’ha gnanca un fià vardà!
Ho pensà: ghe lasso scrito
un biglieto de fortuna...
Ma de penne o de matite
... no ghe n’era gnanca una!
Par fortuna che, pensando
a come l’è cambià la scena,
proprio in mezo ai me pensieri
m’è restàda sol... la pena!