La cinta muraria

El giornàl el ne le annuncia
come na notissia bela...
ma l’è come ne le brase
cascàr zo da la padèla!
I ne conta che dei forti
e dei bastion la proprietà
da l’Esercito al Comune
pian pianìn la passarà!
E l’Assessora co entusiasmo
dise: “Ohi, che sodisfassion!
Pensarem dèsso noantri
a la so vàlorizassion!
E i veronesi finalmente
i rilezarà la storia,
e, passeggiando in mezo al verde,
ghe ne scovrirà la gloria:
dal Caterina su al Sofìa,
da le Preare zo al Pestrìn
rinassarà tutta la cinta
con intorno un gran giardìn!”
Così la dise... ma, a pensàr
a qualche bala fra le tante,
bisòn dir che sta notissia
in realtà l’è preoccupante!
Basta vedar, là in Comune,
che idea i g’ha de la cultura,
e vardàr po’, i munumenti,
in che modo che i le cura!
Quando – esempio – l’Arsenàl
l’era tegnù dai militari,
gh’era viali, albari, case
con un lustro sensa pari!
Da quando l’è passà al Comune,
i giardini i s’ha malàdi,
e le case casca in tochi
coi so tetti sbudelàdi!,
finché ’l Comune l’esibisse
sopralluoghi e gran promesse
che i giornài esalta lieti
ma che i è sempre le stesse...
e la bocca ’l se impenisse
del futuro de Verona,
desmentegando da ignoranti
l’unica roba che funsiona...
E ’l degrado l’è quel stesso
che a Porta Vescovo se cata,
in do’ fra sporcarìe, macerie,
pascola solo qualche gata...
L’è facile ’lora immaginàr
‘sa succeadrà in sti forti:
i ghe farà gran sopralluoghi
coi progetti più contorti!...
E i giornài, sempre ossequienti,
sarà pronti tutti quanti
con gran foto e titoloni
ai ’nunci più mirabolanti...
come quei che da trent’ani
i conta sempre puntuali,
promettendo un gran futuro
par tuti i beni comunali!
ma quel che tutti le accomuna
ancó l’è solo, a ben vardàr,
... un patrimonio sbandonàdo
circondàdo dal luamàr!