Vao a far la Ronda

Sarà par la paura,
o par la propaganda
che te dise: i è selvaggi
quei che riva... da l’Uganda,
fatto sta che, cavalcando
de le insicuresse l’onda,
dèsso tanti in Valpantena
dise: mi... vao far la Ronda!
Le Ronde qua a Verona
le gh’è za stàde in verità,
reclamizzàde in pompa magna...
sarà stà du o tri anni fa.
L’avea presentàde ’l Sindaco
con gran vanto e paroloni,
con gran foto sui giornài,
interviste e titoloni...
Gh’era el militante intrepido
belo lustro e paciocon,
inorgoglì e tuto contento
d’essar stà in television...
I dovea vardàr se in giro
gh’era malintensionati...
ma no i podeva intervegnìr!,
ché no i era gnanca armati.
Se qualcosa de sospeto
i vedeva tra la gente,
i dovea telefonàr!,
però... tempestivamente!
“Varda” “Dove”? “Là, quel moro!”
“Dai, fasemo pian pianin...”
“Presto, dai, tìrelo fora!”
“Eh?! “Diseo ’l telefonin!”.
“Dàme el numero” “In do’ èlo?”
“L’aveo messo qua in scarsèla”
“Te l’avei scrito s’un bilieto”
“L’è cascà ne la gamèla!”
“Ma ’sa g’aveito messo dentro?”
“I fasoi col minestron!”
“Presto, dai, che quelo scapa!”
“... co le codeghe l’è bon...”
“El bilieto! L’ho catàdo!”
“Ma... l’è za mezo cancelà!”
“Femo almanco i primi numeri!”
“Ben, l’è istesso... l’è scapà!”
E a la fine, mai riussendo
a intervegnìr in qualche bega,
i ha tacà a distribuìr...
volantini de la Lega!
Sicché, dopo un par de mesi,
i l’ha messe in un canton...
e i n’ha dito, de le Ronde:
“È finì la so mission!”
È restà l’insicuressa
e i balordi nei giardini...
no è mìa finìda l’emergensa,
è finìdi... i volantini!