La bataglia

Quando finìa le scole,
anca ’lor se festegiava...
de gioia e de letissia
el cor el se impissàva...
Se saludàa i amissi,
i profe e i so comandi...
co la gioia un poco sconta
d’essar diventà più grandi...
Ne spetava la vacansa,
i zughi de l’istà,
i libri zà molàdi,
i sogni spampanà...
La festa ne lassava
nei oci un gran slusor...
la gioia e la letissia
le festeggiava in cor...
Ma è diventà ’desso de moda
de sluamaràr la festa!:
par festeggiàr la fine,
bisòn ’ndar via de testa!
Così, a l’ultimo giorno,
par na guera i se combina!
I porta in classe i ovi,
i elmetti, la farina!
E i “classici” schieràdi,
futuri dirigenti,
i “scientifici” i affronta
come tanti deficienti:
pituràdi da bataglia
o adobà da carneval,
con de ovi e de farina
un autentico arsenàl,
con balestre de ovi duri,
con i scudi de carton
i se urta, i se combate
col servèl in pingolon...
E passiensa se a la fine
i se godesse da par lori!
Ma i sluamàra dapartuto,
e po’ i somena dolori:
i fa scapàr via la gente...
ai vecioti in t’un momento
ghe par d’essar tornàdi
a quel bombardamento...
E schieràdi po a bataglia,
infarinàdi e sparsi,
i slancia dapartuto
fritàje de ovi smarsi!
Ha vinto quei del Classico!,
ne annuncia po ’l giornàl...
come a dir che se i ha vinto
vol dir proprio che i val!
Ma parcossa i abia vinto
l’è ciaro, l’è palese:
parché i ha studià mejo
... dei vandali le imprese!