L’informassion in ferie

Ghe sia fredo ingiassà
o anca un caldo equatoriale,
la dovrìa, l’informassion,
essar sempre puntuale...
Ma ogni ano la diventa,
quando po’ l’istà la riva,
butà zo a la vateciàva,
tutta un fià aprosimativa!
...parché pol anca succedar
grandi eventi tuti in serie,
ma bisogna tegner conto
che... va i giornalisti in ferie!
In tivù i presenta adesso
i palinsesti de l’inverno...
e par l’informassion estiva
par che regna... il sonno eterno!
...ché showmen presentatori
i è in vacansa, pori cani!...
e sol repliche imperversa
e telefilm americani...
‘Sa ghe importa dei vecioti
con i pié dentro al cadìn?
Se no i pol andàr al mar,
che i se varda Rin Tin Tin!
Ghe sarìa, a Verona, un saco
de spettacoli che vale...
ma l’è morta za da un toco
qua la critica teatrale!
E, sepolto da veline,
el butèl de Redassion
’l preferisse parlàr solo
de la Sagra de Raldon!
Quando po’ riva ’l gran caldo,
foto e immagini tivù,
che ne assale dapartuto,
le ne fa sudàr de più!:
gh’è vecioti in canotiera
con in testa el fassoleto
– come tanti beduini –
ben tacàdi al rubineto,
e turisti con la pansa
imbombegàdi de sudor,
e butèle sderenàde
descolà sensa pudor...
Se te vardi ben ste foto
ritrasmesse o pubblicà,
te t’incorzi con certessa:
i era istesse l’an passà!
E po’ i ghe ritàca soto
i consigli... de l’esperto:
parché ’l sol nol fassa mal,
mejo stàr seràdi al cuerto!
Parché alor le informassioni
le ritorna a essar più serie,
s’ha capì: bisòn spetàr
...che le torna da le ferie!