L’im...mobility day

Par anni e ani contro el smog
no i aveva fatto gnente,
preoccupà che no rivasse
el consenso de la gente,
strafregandose dei dati
che seitàva con sgomento
a prevedar malattìe
a causa de l’inquinamento!
Adesso, dopo un toco,
col coràjo de chi osa,
finalmente i s’ha deciso
almanco sol de far qualcosa!
E i ha fatto un’ordinansa
coi proclami più alti e bei,
annunciando con orgoglio:
“Del mobility c’è il dey!”.
E po’ in conferensa-stampa
i ha esaltàdo el so successo!
(i dati dise n’antra roba,
ma par lori è tanto istesso).
E, con l’ossequio del giornàl,
i se esalta i tri assessori!
“Semo stàdi proprio brai!”
i se dise fra de lori!
Però, fra tutti quei divieti
che lì ha fato la comparsa,
gh’è du tri robete strànie
che rasenta sol la farsa...
I ha fermà le auto vecie,
e po’ serà i ha solo ’l centro,
come se dovesse vivar
solo cì ghe vive dentro...
Tuto intorno però intanto,
su le circonvallassion,
tutti fermi, tutti in coa,
tutti in lenta procession,
fasendo un caos sempre più grande,
tutto un infumentamento,
con velen spuà dapartuto
dai tubi de lo scapamento!
I ha fermà le auto più vecie
sensa la condissionale,
ma – ti pensa che idee ciàre –
ecco po’ l’idea geniale:
ai vecioti sui settanta
i g’ha permesso de giràr,
de spuàr fumi malàdi,
de tranquilli invelenàr...
de imbarcàr sui so catorci
altri veci invelenanti,
pronti a sganassàr de gusto
sul “car-pùlin” tutti quanti!
... ché i vecieti, sì, i se mala,
no i respira, no i camina,
ma però, par el Comune,
de sicuro no i inquina...
“Qusti dey saranno – i dise –
una prova, un incentivo
che l’andare in giro a piedi
venga messo in preventivo!”
In realtà, se te ghe pensi,
a questo l’è servì la prova:
solo a incentivàr la gente
... a compràrse un’auto nova!