La coerensa

Par combàtar contro el smog
ogni dì più sconvolgente,
i geni del Comune
i continua a no far gnente!
“Non lo seriàmo, il traffico!”
i dise ognor come butìni,
ma intanto gran consigli
i ghe manda ai cittadini:
“Fattori più inquinanti
del traffico no gh’è!
E allora fasì i bravi:
par la strada andèghe a pié!”
I giornài, sempre più pronti
a far da coro a cì comanda,
altri inviti, altri messaggi
anca lori ognor ne manda:
“Stasì atenti, de sti giorni!
Scoltè qua, verzì le recie!,
ché par sèrto i fa gran dano
i falò!, quei de le vècie!
Le faville ne infumenta,
e le ne impìna de disagi!”
(dèsso el par, l’inquinamento,
che ’l sia colpa dei re Magi!)
E ne le pagine lì a rente
po’ i ne elenca a volontà
tutti i posti qua in Provincia
indo’ “la vecia” i brusarà!
Quei politici che intanto,
sassinando l’Italian,
fa politica sigando
solo insulti a tuto spiàn,
se un pitoco el casca dentro
a episodi burascosi,
lori i primi i è a sigàr:
“Via! Via! Via i facinorosi!”
E, de fronte al terrorismo,
i ne dise: “Chieti, gente!
El pericolo no esiste!
No ne pol succedar gnente!”
e, fin che i ne le dise,
i arma tutta la città,
i tira su gran muri
e barriere in Piassa Bra!
E se tanti disperàdi,
anca qua in de sta cità,
dorme infagotà nel giasso
parché un tetto no i ghe l’ha,
i dise: “A tanta povertà
noi dobbiamo metter fine!”
... e no i elimina i pitochi,
ma i ghe cava le panchine!
Sarà insomma che i le usa
sconfondendo “dito” e “fato”,
ma ormai par che le parole
no g’abia più significato!,
parché quei che ne comanda
– tante volte sempre i stessi –
i le ingarbùja e le stravolge
sol in base ai so interessi!,
e no ghe entra ne la sùca
cossa mai sia la coerensa,
ma de na roba i è sicuri:
che i pol fàrghene ’nca sensa!