Provvedimenti antismog

Ogni giorno qua i allarmi
i se fa più preoccupanti!
Tutta st’aria invelenàda
pol copàrne tutti quanti!
Se preoccupa i dotori,
i infermieri, i portantini...
sìga “aiuto” tutti i giorni
e i esperti e i cittadini...
Solo quei che ne amministra
da sta recia no i ghe sente!
Che la gente la se mala
par che no ghe importa gnente!
Anca i giorni del “mobility”,
presentà come vangelo,
a la fine i ha deciso
de piantàrli sul più belo!
“Eh, mai più seremo el traffico!
– i ha pensà – gh’è i mercatini,
gh’è i banchetti, gh’è i presepi,
gh’è anca i roghi pa’ i butini
(proprio quei che più invelena)
... ma la gente la le speta!
E gh’è pensieri ben più urgenti,
tipo... casa de Giulieta!
... che, se sa, l’è tuta finta
ma... seitemo a no dir gnente!
ché la pol servirne ancora
pa’ imbrojàr mejo la gente!”
Ma dèsso che la situassion
qua l’è tanto peggioràda,
parfìn lori s’ha inacorto
che ormai l’ora l’è rivàda,
che bisogna far qualcosa...
No se pol solo, in sostansa,
sta al caldo là in Comune
a gratàrse un fià la pansa!
Se dovrìa pa’ almanco un poco
tutto el traffico fermàr!,
par permettarghe a la gente
de tornàr a respiràr...
ché, se l’è vèra che sto smog
pol invelenàrne tuti,
bisòn proprio far qualcosa
prima che ne aumenta i luti!
“Se i more in tanti, po ci compra?
Gh’è da pensàr al fatturato,
a le botteghe da impenir,
a le leggi del mercato!...”
E finalmente i s’ha deciso
a ciapàr provvedimenti...
stando attenti che i più siori
po’ no i sia massa scontenti...
L’è così che, fin che ’l fredo
ne sgarìssola le recie,
no i ferma mìa tutte le auto...
no, no!... solo le più vecie!
Tanto po’ i buttarà fumo
straparlando de incentivi,
de lessioni, educassion,
(e de incassi e preventivi!)
che solo a questo i n’ha educàdo:
a speràr che un giorno piova,
e a muciàr un po’ de schèi
... par compràrse un’auto nova!