I se le fa e i se le dise

In na conferensa stampa
convocàda a ropeton
i s’ha fatto in tri, riunìdi,
la so auto-esaltassion!:
Mobilità, Cultura e Ambiente,
eleganti, lustri e bei,
s’ha riunìdo pa’ esaltar
i “Mobility” so “dey”!
... che sarìa stà quele feste
quando, in barba a l’emergensa,
i ha deciso: de chiusure
se pol fàrghene anca sensa!
E serà i ha infine el traffico,
però solo un pochetìn!,
decretando “zona chiusa”
proprio solo un tochetìn...
proclamando: “Non ci preme
il respirare, il circolare...
A noantri – udite, gente! –
ci interessa... l’educare!
Lasciam pure nei quartieri
tutto il smog che... za che ’l gh’è!
ma insegniamo al cittadino
quanto è bello andare a piè!”
... Ghe vorìa in realtà ben altro
se i alarmi qua no i mente,
se l’è vèra che co st’aria
a ris-ciàr l’è tanta gente...
Ma el giornàl, a ste siè feste,
co la solita ossequiensa,
“le domeniche senz’auto”
l’ha ciamàde co obediensa!
E dèsso lori è lì felici
a snocciolàr numeri e dati,
percentuali accomodàde,
consuntivi e risultati...
e con orgoglio e con sorpresa
po’ i ne annuncia a mane verte
quele che in realtà par lori
i è incredibili scoperte!
I ne dise: “Abbiam scoperto
che in do’ le macchine no passa
gh’è le polvari che cala,
e che le scapa tute in massa!
E su tutti i bus navetta,
mezi vùdi fin a ieri,
vardè qua: in sèrti momenti,
è aumentàdi i passeggeri!”
E l’Assessora a la Cultura,
sempre garrula e allegretta,
zonta: “E quanta, quanta gente
alla casa di Giulietta!”
... che, se sa, co la cultura
no la gh’entra proprio gnente,
ma, va ben, tuto fa brodo
se se vol spenàr la gente...
E, a la fine de la festa,
tuti allegri i tre assessori
“Siamo stati proprio bravi!”
i se dise fra de lori.
E proprio quei che g’ha servìdo
tuto questo esaltamento
dèsso pronti g’ha ’ltri titoli
su... l’allarme inquinamento!