L’“approccio al spostamento”...

Par tri mesi i n’ha esaltàdo
quei “mobility” so “dey”...
com’i avesse realizàdo
un progetto dei più bei!
E i giornài: “Sì, tutti a pié!”
intitolava compiaciuti...
quando dopo, intorno al centro,
i circolava proprio tuti!
Sti “mobility” in realtà
no è servidi proprio a gnente:
solo a invelenàr ancora
n’antro pochetin la gente!
Quando po’ è finì novembre,
i ha deciso imantinente:
“Ecco, adesso par du mesi
no faremo mia più gnente!”
... dando prova con certessa
de un tempismo eccessional!:
proprio adesso no i fa gnente,
quando el smog el fa più mal!
... proprio adesso che col caos
l’aria l’è più invelenàda,
e da ozono e sforamenti
e dal traffico intasàda!
Così infatti dise i dati:
dopo sti... provvedimenti,
la situassion l’è sempre pezo,
bisòn star ben su l’attenti!
E i dotori, inascoltàdi,
“Gh’è un alarme!” i sèita a dir
“ché de smog e inquinamento
qua se pol anca morir!”
Ma quei geni de assessori,
domandà de un’opinion,
imperterriti i va avanti
ne la so auto-esaltassion:
“L’intento dei mobility
non volea far respirare!
Solo questo c’importava:
qua il popolo educare!”
E i ghe zonta un gran finale
a l’insulso so commento:
“Son serviti, i dey, a insegnare
sol.. l’approccio al spostamento!”
Se malaremo insoma in tanti
par sto smog a profusion...
però, grassie a sti “mobility”,
pensa che sodisfassion!:
avarà tutti i veronesi
imparàdo, ben o mal,
el giusto “approccio al spostamento”
da la casa a l’ospedal!...
e ai più fortunà se zonta
anca l’augurio più sincero:
de dopràr l’approccio giusto
... par spostàrse al cimitero!