L’ultimo “day”

Col nome in ostrogoto
par condìr mejo le bale
o par dàrghe a la trovata
na nomea internassionale,
seguendo anca quel princìpio
proclamàdo a tutto spian,
in base al qual par sèrto
“es mejo do che uàn”...
i se g’ha messo in du
(no du esperti, du assessori)
a partorìr st’inissiativa
contro ’l smog, contro i motori!
E i g’ha ciamà “mobility”,
a sti “dey” sconclusionà!
In realtà i era “immobility”
mille auto incolonnà!
Però intanto anca ’l giornàl,
sempre un poco lecapié,
ha seitàdo a straparlàr
de giornàde “tutti a pié”...
a esaltàr, de ste dominiche,
l’educativa so natura,
con la “festa de la bondola”
caposaldo de cultura!
E i ha ’nunciàdo impavidi,
la dominica passà,
che sto dey “or per quest’anno
proprio l’ultimo sarà”...
come a dir che, quando el smog
più invelenarà la gente,
proprio alora par du mesi
lori no i farà più gnente!
Intanto i s’ha inventà de tuto:
norme, regole, eccessioni,
e delibere contorte,
e paragrafi, infrassioni...
fin a quando che i ha dito:
“Vùto chieto circolàr
e con tri quatro amici
tutto el clima invelenàr?
Sì, va ben, te do el permesso
de seitàr a far dei dani...
però a sol sta condission:
che te g’abi settantàni!
Sicché po’ a la fine almanco,
fra tanto astruse novità,
n’è restà, certificata,
sta curiosa verità:
che ’l vecioto, sì, el scantona,
e po’ el sbossega, el scapussa,
el tontona, el se incocona,
el pol ’verghe ’l fià che spussa,
el g’ha dolori dapartuto
da la sera a la matina...
ma na roba l’è sicura:
el vecioto... no l’inquina!