El vero e 'l falso

Quando qua da Legambiente
la classifica è rivà
a dirne ancora che a Verona
gh’emo l’aria invelenà,
con gran sdegno e sicumèra
l’Assessore... competente
el n’ha dito: “Sta classifica
no la vale proprio gnente!
L’è invidiosa, l’è busiàra,
no la dise la realtà...
senti qua che bel’arieta
se respira in sta cità!”
Quando è emersa la notissia
che i milioni pa ’l traforo
no i gh’è più, sèrto no i riva
par el drito o de straforo,
l’Assessore: “No è mìa vèra!
L’è za l’iter completà!
Tutto bene, andiamo avanti!
Il traforo... sì, si fa!”
E, par darghe più rason,
anca el Sindaco ha zontà:
“Mi la luce in fondo al tunnel
za la vedo... eccola là!”
E quan’ proprio de sti giorni
è rivà gran paginoni
a riportar de Veronetta
tute le preoccupassioni,
le paure, le tensioni,
el timor, la scontentessa
de un quartiere sasuressa,
pronto el Sindaco ’l ne dise
che i è tutte “falsità!”:
“Tute quante ste proteste
cissà mai cì l’ha inventà!
A Veronetta no l’esiste
el problema sicuressa!
Sentì mi che ve comando:
el quartier l’è na belessa!
Tute bale, no è mìa vèra,
no gh’è mìa preoccupassion!
De sporcissia, furti o risse
no gh’è gnan’ la percession!”
... Bituàdi a contàr bale
co un fiantin de prepotensa,
i ghe crede solo al specio
e i rinnega l’evidensa!
... e i stravolge la realtà,
pronti a dirte, se te insisti:
“Ti stà bon, scòlteme mi...
no so gnanca se te esisti!”.