El turno de le buse

Siccome che ’l Comune,
par risolvar dei malani,
no l’ha mai fato gnente
par anni e ani e ani,
i sbàra sul giornal,
a intervalli regolari,
sempre i stessi titoli
coi caratteri più vari!
Sul smog un giorno i scrive:
“C’è l’allarme inquinamento!”
o “In città non si respira!”
“Le polveri in aumento!”...
I buta lì l’allarme
“Non si può respirar!”,
ma i se varda ben ognora
d’azardarse a criticàr!
No i dise: “Sarìa urgente
ciapàr provvedimenti!”,
ma a le sempiàde del Comune
i se mete su l’attenti
e, con puntuale ossequio,
i tase servilmente
che i “days” de la “mobility”
no i è servìdi a gnente!
Ma gh’è za altri titoli
ogni tanto ricorrenti,
che pesca ne l’archivio
sempre stessi i argomenti...
Na volta al mese i ’nuncia
el progetto comunale
par sistemàr pulito
finalmente l’Arsenale!
... i ghe ne parla da trent’ani
con sopralluoghi e foto...
I promette, i briga, i dise...
e no i se mette in moto!
E ogni volta, el giorno dopo,
i ne conta ’sa ghe speta
al turista che vol vedar
qua la casa de Giulieta:
se discute del bilieto,
e del presso de l’ingresso,
del Museo, e de quel muro
sluamaràdo come un cesso...
Dopo un altro po’ de giorni,
el problema qua più vero
par che ancó sia diventàdo
sistemàr Castel San Piero!
I le promette, i le assicura
za almanco da trent’ani...
sicuri che comunque
no i le farà in sent’ani!
...Finché dopo tante bale
contàde senza scuse,
in sti giorni eco rivàdo
el turno... de le buse!
I ne annuncia “Ghe n’è massa”
come fusse novità...
za savendo che po’, tanto,
mai nessun le stuparà...
regalandose la voja
de altri titoli sonanti,
travestìdi da notissie
pa’ imbroiàrne tuti quanti.