I verbi dei titoli

Ne diseva la maestra,
con un far intransigente,
che una frase sensa verbo
no la dise proprio gnente.
Se adesso quei che scrive
i è serventi abituali,
i se cata in confusion
nel dopràr tempi verbali.
I politici ogni tanto,
a intervalli regolari,
i ne sbàra gran proclami
co impudensa sensa pari...
e de paca i giornalisti,
con complicità ossequiente,
ghe ne fa gran titoloni
par impressionàr la gente!
Ma, savendo che ogni volta
no gh’è gnente de sicuro,
i ne annuncia le notissie
coniugandole al futuro:
“Un grande Central Park
proprio in centro nascerà”
“In un mese tante buche
spariran dalla città”
“Le Olimpiadi del tremila
si faranno alla Spianà”
“Capital della Cultura
or Verona diverrà”...
Altre volte, preoccupàdi
de contàr fin massa bale,
eco: al posto del futuro,
i buta là ’l condissionale:
“Potrebbe sorgere in collina
il Museo della città”
“Sol con questo Presidente
si potrebbe stare in A”
“Potrebb’essere Verona
la città dei monumenti”
“Coi lumini sulle strisce
sparirebber gl’incidenti”
Ma dopo anni de proclami
sul Museo, su l’Arsenale...
anca lori s’ha inacorto
d’aver sempre contà bale
e, causandoghe sti verbi
qualche crisi de cossiensa,
i ha pensàdo: a la fin fine
se pol fàrghene anca sensa!
Fato sta che, forse stufi
de imbroiàr sensa riserbo,
scominsià i ha tosto, i titoli,
dèsso a farli sensa verbo!:
“Gran rilancio dell’Arena!”
“Nuovo stadio pe ’l Verona!”
“Central Park in Pradaval!”
“Palaghiaccio Marangona!”
“Ecco l’isola Giulietta”
“Grandi uffici all’ex Campone”
“Sicurezza a Veronetta”
“Grandi giostre in via Pallone”
...così, quando, de ste robe,
dopo no se avvera gnente,
s’ha nettàdo la cossiensa
quei che ha imbidonà la gente!