I contafole de ancó

I è gran tanti i contafòle
– ghe n’è tuti i cantoni –
che ogni tanto i ne impenisse
de fole e de visioni...
e i se gode po’ a contàrne
tutto un mondo che no gh’è:
quel che i vede solo lori,
o tuttalpiù qualche lacchè...
I ne conta che l’è pronto
– e i le fa scrivar sul giornàl –
el piano par giustàrlo tuto,
e sistemàr ben l’Arsenàl!
E pa ’l balcone de Giulietta,
n’antro sito dei più bei,
i dise: “Ghe n’è pronto n’antro
par spartìrse mejo i schèi!”
E po’ i conta: “El stadio novo
za el soddisfa tutti quanti!
No gh’è mia solo ’l balon,
m’anca boteghe e ristoranti!”
E: “Ghè ’l filobus za pronto!
Tutto za a regola d’arte!”
Ma dov’elo? E dove vàlo?
“Sìtti, sìtti: eco che ’l parte!”
E po’: “Ecco il Central Park!,
par i bocia e le butìne!”
... i ghe ciama – pensa – Central,
... e i le fa a le Golosine!
I è in realtà le stesse fole
che i ne conta da trent’ani,
e ogni tanto i le riconta
par tegner sconti i malani...
E in sti dì di quel’Assessora
che ha partorì ’l famoso bando
dopo averlo sol copiàdo
de scondon, de contrabando,
la conta: “Noi facciam miracoli
per la cultura, qua a Verona!”
... e l’è ciàro che la crede
d’essar ela la Madona!
E se zonta ai contafòle
el Presidente del Verona,
in do’, a sentìr quel che ’l s’inventa,
gh’è za tutto che funsiona!,
e, rispondendo a le interviste,
el se crede intelligente
nel dopràr tante parole
pa’ in sostansa no dir gnente!
E za su la stressa strada
gh’è ’l so Grosso allenator,
che, dopo ogni batosta
finì sol col brusacor,
serafico el ne conta:
“Abbiam creato le occasione!
Almen dieci palle-gol,
attaccando a profusione!”
In realtà nessun le ha viste...
el g’ha vu’ de le visioni!
e ogni volta el ghe le conta
ai tifosi tontoloni...
I è sol “balle” sensa “gol”,
e ormai se sa quanto val:
come quele su Giulietta,
la cultura e l’Arsenal!