El progeto più importante

Quando Scespir, con quel motto
che da anni ancora el dura,
el scriveva “Non c’è mondo,
non c’è! fuor di queste mura”,
no l’intendeva mìga sèrto,
co sto verso che funsiona,
de esaltàr più de tant’altre
la belessa de Verona...
In realtà ’l volea sol dir
che, par chi g’ha na sbandata,
no gh’è mìa posto più belo
de... in do’ vive la so amata!
... un po’ come là su in Francia,
dove, sotto i “cieli bigi”,
s’usa dir al stesso modo:
“In do’ gh’è Gigi, gh’è Parigi”!
Ma noantri, spudorati,
con spietato oportunismo
ghe n’avem subito fato
uno slogan pa ’l turismo!
E in do’ gh’era un cortileto
solitario, na piasseta...
inventà s’emo... un pogiòlo:
el “balcone de Giulieta”!
E, visto un dì n’arbio dei bo
sluamaràdo e sbandonà,
eco pronta un’altra bala:
fin la “tomba” emo inventà!
E felici e ’nca orgogliosi
de sto imbròjo a tutto tondo,
sproloquiemo che sto sito
l’è el più visitato al mondo!
E, par ciuciàr sempre più schèi,
el Comune ogni momento
ghe ne inventa una de nove
p’aumentàr el sfruttamento!
E a brigàr gh’è in prima fila
l’Assessora “competente”!...
pur se in vero la Cultura
qua no gh’entra proprio gnente!
E, par far dèsso completo
qua st’imbrojo poco serio,
obbligàr i vol la gente
a passar fin da Valerio!...
n’antro che za ’l poro Sespir
el l’ha ben tuto distorto:
el g’ha fatto dir de tuto
profitando che l’è morto!
Sarìa da valorizzar
tant’altri siti sensa bale:
trasformàr in gioielìn
el teatro a l’Arsenale,
e i soteranei, el Lazareto,
el palasso regionale,
i capolavori sconti
dentro la Capitolare...
Ma, p’aver foto sui giornài
e continuar a contàr bale,
ben vedemo qual, fra i tanti,
l’è ’l progetto principale:
l’è el “balcone” sol, par lori,
el più importante che ghe sia!
... monumento a l’ignoransa,
Oscar de l’ipocrisìa!